Busturialdea Urdaibaiko Eskualdeko Plan Estrategikoa: Zer inbersino aurreikusten dira Barrutialde eta Nautika Eskola modernizatzeko?
Barrutialde eta Nautica Eskola Modernizatzeko inbertsinoaren nondik norakoak azaldu dauz Inge Gorostiagak.
Luis Iriondo Aire zabaleko V.Pintura Lehiaketak arte-estudio handi bihurtuko dau Gernika-Lumo
Arteskolak antolatu dau hitzordua, Kultur Etxeagaz alkarlanean, eta garagarrilaren 26an herriko paisaiak, ondarea eta eguneroko bizitza zuzenean islatuko dabezan margolariak bilduko dauz.
Gernika-Lumoko kaleak aide zabaleko oihal handi bihurtuko dira uda honetan be. Datorren garagarrilaren 26an, uribilduak ‘Luis Iriondo’ Aire Zabaleko Pintura Lehiaketaren bosgarren edizinoa hartuko dau, Arteskola arte eskolak bertako Kultur Etxeagaz alkarlanean bultzatutako hitzordua. Bertan, hainbat jatorritako artistak bilduko dira herriko txoko esanguratsuenetako batzuk zuzenean margotzeko.
Jaialdiak Luis Iriondo omentzen dau, margolari autodidakta eta 1937ko Gernikako bonbardaketatik bizirik atera zan azkenetariko bat, bere ibilpide artistikoa uribilduaren oroimen historikoagaz oso lotuta egon zana. Bere figurak, edizinoz edizino, uri-espazioa sorkuntza-agertoki bihurtu eta artea herritarrei hurbiltzea bilatzen dauen lehiaketari izena emoten deutso.
18 urtetik gorakoek parte hartu ahal izango dabe, eta goiz osoa izango dabe herrian inspirautako obra bakarra egiteko, bertako paisaiak, ondarea edo eguneroko bizitza. Gaia librea izango da, erabilitako teknika lez, eta olioa, akrilikoa, akuarela edo teknika mistoak erabili ahal izango dira.
Jardunaldiari hasiera emoteko, euskarriak silutuko dira 09:00etatik 10:00etara Kultur Etxean. Une horretatik aurrera, parte-hartzaileak udalerriko hainbat gunetan banatuko dira beren obrak egiteko, eta 14:00ak baino lehen entregau beharko dira.
Foruen Plazak, Udaletxearen inguruak, Kultur Etxeak eta Bakearen Museoak azokaren jardueraren zati handi bat bilduko dabe barriro, baina artistek Gernika-Lumoko edozein txoko aukeratu ahal izango dabe inspirazino-iturri gisa.
Lehiakorra izateaz gan, lehiaketak sormen prozesua publikoari hurbildu gura dino, herritarrek eta bisitariek goizean zehar obrek forma zelan hartzen daben ikusteko aukera izan daien. Ordu batzuetan, herriko kaleak tailer artistiko edegi bihurtuko dira, eta pinturak uriko paisaiarekin eta udalerriaren historiagaz berba egingo dau.
Lehiaketak 2.600 euro banatuko dauz guztira saritan. Irabazleak 1.000 euro jasoko dauz; bigarrenak eta hirugarrenak, barriz, 600 eta 400 euro, hurrenez hurren. Gainera, 300 euroko saria emongo jako bertako artista batek egindako lan onenari, eta 300 euroko beste sari bat, herri-bozketa bidez emondakoa, beti be epaimahaiaren sariren bategaz bat ez badator.
Gernika-Lumoko hurrengo bederatzi proiektuak
Udaletik Herrira programa honetan Jose Maria Gorroñok, Gernika-Lumoko alkateak, hurrengo hilabeteetarako dauzkan proiektuak azaldu dauz, eiten ari direnak eta eitzeko dauzenak:
Gernika-Lumoko Udalak euskararen erabilera sustatzeko webgune barria jarri dau martxan
Gernika-Lumoko Udaleko Euskara Sailak www.gernika-lumo-euskaraz.eus webgune barria aurkeztu dau, euskararen sustapenari lotutako udal baliabide, zerbitzu eta informazino guztiak plataforma bakar batean batzeko.
Atari barriaren bidez, herritarrek laguntzak, programak, argitalpenak, kanpainak eta euskara ikasteko zein erabiltzeko baliabideak modu erraz eta intuitiboan kontsultau ahal izango ditue. Webgunea herritarrei ez ezik, alkarteei, ikastetxeei, enpresei eta saltokiei be zuzenduta dago.
Berrikuntzen artean, errumanierazko atal berezi bat be badauka, udalerriko atzerriko komunitate handienetako bati informazinoa bere hizkuntzan eskaintzeko eta euskarara hurbiltzea errazteko.
Tresna digital barri honegaz, Gernika-Lumoko Udalak beste pauso bat emon dau euskararen normalizazinoaren alde, udaleko baliabide guztiak webgune bakar batean zentralizatuz eta herritarren eskura jarriz.
Mañuko Karmen jaiak bihar hasiko dira hiru eguneko egitarau zabalagaz
Bermeoko Mañu auzoa prest dago Karmen jaiak ospatzeko. Bihar hasi eta zapatura bitartean, auzoak adin guztietarako jarduerez betetako egitaraua eskainiko dau, tradizinoa, gastronomia, musikea eta herri kirolak uztartuz.
Jaiak bihar, Karmen Egunean, hasiko dira txupinazoagaz. Ondoren, meza nagusia egingo da, eta eguerdian umeentzako jolasak izango dira. Arratsaldean gaztelu puzgarriak hartuko dau protagonismoa, eta iluntzean Sustabizen eskutik herri kirol erakustaldia izango da. Aizkolariak, harri-jasotzaileak, trontzalariak eta ingude-jasotzaileak izango dira ikusgai, trikitilariek giroa alaitzen daben bitartean.
Barikuan gastronomiak eta zaletasun tradizionalek hartuko dabe lekukoa. Makailo dastaketa egingo da trikitilarien doinupean, eta gauean zaldi-proba erakustaldia izango da.
Zapatuan amaituko dira jaiak VIII. Tortilla Txapelketagaz. Arratsaldean izen-emotea zabalduko da, DJ Bogdan Rumak giroa berotuko dau, eta ostean tortillen aurkezpena, epaimahaiaren balorazinoa eta sari-banaketea egingo dira. Lehen hiru sailkatuek diru-sariak eta otzarak jasoko ditue.
Urtero lez, antolatzaileek herritarrak Mañura hurbiltzera gonbidatu ditue, auzoko giro bereziaz gozatu eta Karmen jaien tradizinoari eusteko.
Alkartasuna Dantza Taldearen 50.urteurrenaren ekitaldi berezia
Bermeoko Artza Frontoiak Alkartasuna Dantza Taldearen 50. urteurreneko emanaldi berezia hartu dau. Taldearen historiako hainbat belaunaldi batu dira oholtza berean, lehenengo dantzariak eta gaur egungoak alkartuz, mende erdiko ibilbidea ospatzeko.
Ikuskizunak une hunkigarri ugari izan ditu. Dantza tradizional eta ezagunen bidez, taldeak urteotan egindako lana gogoratu dau, dantzari, txistulari eta trikitilarien parte-hartzeagaz. Horreen artean, Korrontza taldeko trikitilaria be izan da, hainbat dantzari doinua jarriz.
Emanaldian omenaldi bereziak be egin dira, eta Bermeoko Udalak be bat egin dau ospakizunagaz. Nadia Nemeh Shomaly alkateak eskerrak emon deutsee Alkartasuna Dantza Taldeko kide guztiei, herriko kultura eta euskal dantzak belaunaldiz belaunaldi bizirik mantentzeko egindako lanagaitik.
Artza Frontoia jendez bete da, eta ikusleek txalo zaparradaz lagundu dabe emanaldi osoa. Musikea, dantzea eta emozinoa protagonista izan dira, Alkartasuna Dantza Taldearen 50 urteko ibilbidea gogoratuz eta ospatuz, herriaren kultur ondarearen parte garrantzitsua dala barriro be agerian itxiz.
Aurresku izeneko kartelak irabazi dau Bermeoko Andra Mari eta Santa Eufemua jaietako kartel lehiaketa
Bermeok badauka dagoeneko 2026ko Andra Mari eta Santa Eufemia jaiak iragarriko dituan kartel irabazlea. Herritarren botoei esker, “Aurresku” izeneko lana izan da lau finalisten artean aukeratua.
Kartel lehiaketako irabazlea Eugenio Gabriel Lasarte Arlanzón izan da. Bozketea Gizarte eta Kultura Etxean eta internet bidez egin da, eta herritarren parte-hartze handia izan dau.
Guztira 809 boto jaso dira; horreetatik 802 baliodun izan dira eta 7 baliobako. Internet bidez 711 boto emon dira, horreetatik 3 baliobakoak, eta Gizarte eta Kultura Etxean jarritako hautestontzian 98 boto jaso dira, 4 baliogazebegaz.
Udalak zorionak emon deutsoz irabazleari, eta eskerrak emon deutsee lehiaketan parte hartu daben kartel-egile guztiei eta irabazlea aukeratzeko botoa emon daben herritarrei. Azpimarratu dauenez, herritarren parte-hartzea funtsezkoa da jaiak herritarrenak izaten jarraitzeko.
Kartel irabazlea izango da datorren abuztuan ospatuko diran Andra Mari eta Santa Eufemia jaietako irudi ofiziala.
