Busturialdea Urdaibaiko Eskualdeko Plan Estrategikoa: P17 – Ainara Basurko- Planak 78,4 milioi euroko inbersinoak aurreikusten dauz eskualderako 2030 urtera arte, baina zonaldeak 303 milioi euro jasoko dauz guztira
Bariku honetan, irailaren 11an, arratsaldeko 19:30etan, Euskal Oiloaren Lagunen bigarren topaketa ospatuko da Mendatako Artape Jatetxean, Eoalak Elkartearen eskutik. Euskal oiloen arrautzak eta bertoko txakolina dastatzeko aukera izango dabe bertaratzen diranak.
Horrez gan, domekan, irailaren 13an, goizeko 9: 30etatik aurrera, Nekazal azokaren 38. edizinoa ospatuko dabe mendatarrek. Bertan, euskal oiloaren erakusketa eta salmentaz gan, hainbat produktu erosteko aukera izango dabe bertaratzen diranek.
Beste alde batetik, Mendatako Udaletik azpimarratu daben moduan, Basques In Australia erakusketa izango da ikusgai Elizoste Etxean datorren domeka honetara arte. Sarrera doakoa da.
Gernika-Lumoko Udalak herriko hainbat puntutan aurreikusitako asfaltatze-lanak amaitu dauz, zorua barritzeko eta ibilgailuen zein oinezkoen zirkulazino-baldintzak eta segurtasuna hobetzeko. Lanak Arane, Agirregane, Allende eta Kortezubi kaleetan burutu dira, eta orain Txorroburu, Lorategieta eta Carlos Gangoiti gehitu jakez.
Jarduera bide sarea manteniduteko udal planaren barruan dago eta 272.600 euroko inbersinoa izan dau. Obrei esker, denporaren joanaren, eguneroko trafikoaren eta baldintza meteorologikoen ondorioz higadura handiagoa eben eremuetan jardun ahal izan da.
Bide-zorua barritzeak aukera emoten dau kaleen bizitza erabilgarria luzatzeko eta udalerriko hainbat puntutan zirkulazino-baldintzak hobetzeko. Jarduerak, gainera, jarraipena emoten deutse aurreko urteetan egindako asfaltatze-kanpainei, bide-sarea manteniduteko udal-estrategiaren barruan.
Irailaren 5ean, hileko lehen zapatuan, Azoka Berezia izan da Gernika-Lumoko Merkatu Plazan. Euskal ortuari eta artisautzaren erakuslehio honenarekin batera Bizkaiko Untxia eta sagardoa izan dira jardunaldi berezi honetako protagonistak.
Ikasturte barriagaz batera, Bermeoko Udalak, Euskara Sailaren bitartez, gurasoentzako eta etorkinentzako euskera eskolak antolatu dauz, AEK eta Gotzon Garitaonaindia euskaltegiekin alkarlanean. Ikastaro horien bidez, alde batetik, familia bidezko transmisinoa indartu gura da, euskera ez dakien gurasoei ikasteko erraztasunak emoteko; eta, beste alde batetik, Bermeora kanpotik etorri diranentzat euskera ikasteko aukera zabaldu gura da. Ikastaro hauetan parte hartzeko interesa daukatenek irailaren 30era arteko epea izango dabe izena emoteko; Berhaz bulegoan emon beharko da izena edo dagokion euskaltegian.
Bestalde, 2026-2027 ikasturtean euskera ikasteko matrikulazino kanpaina martxan dagoala gogora ekarri dabe. Hiru zentro dagoz Bermeon euskera ikasteko: hizkuntza Eskola Ofiziala, AEK eta Gotzon Garitaonaindia. 16 urtetik gorako edozein herritarrentzat “aukera anitza eta ordutegi zabala” daukatela aitatu dabe, “Metodologia eguneratuak eta baliabide egokiak” eskainita.
Hizkuntza Eskola Ofizialak be eskaintza zabala dauka 2026-27 ikasturterako, maila guztietarako eskolatzeko aukera eskaintzen dabe. Aurreko ikasturtean esate baterako, A1eko talde bat be izan eben, eta aurten be maila bereko talderen bat osotzea aurreikusten da. Ikastaro horretan be, oinarri-oinarrizko komunikazinoa lantzea dabe helburu, “Giro abegikorrean eta ikasle bakotxaren ezaugarriak eta beharrizanak kontuan izanda”. Hizkuntza eskolak eskaintzen dauena, “Metodologia komunikatiboa eta aktiboa” dala aitatu dabe. Horrez gan, bakarkako arreta eta eskola inklusiboa eskaintzen dabela gaineratu dabe.
Hizkuntza Eskola Ofizialean izena emoteko epea zabalik dago, eta gabonilaren 30era arte zabalik izango da. Matrikularen prezioa “sinbolikoa” da, eta “arazorik izatekotan, bekak eskatzeko aukera be badagoela” gogorarazo dabe.
Gernika-Lumoko Udalak urriko bi azoka handietan izena emoteko epea ireki dau: urriaren 5ean egingo dan Lehen Astelehenean eta urriaren 26an egingo dan Azken Astelehenean. Euskal Herriko baserritarrek, ekoizleek eta artisauek irailean aurkeztu ahal izango dabez eskabideak bi merkatu berezi horietan postu bat lortzeko.
Lehenengo astelehenerako, izena emoteko epea irailaren 18ra arte egongo da zabalik; azken astelehenean parte hartu gura dabenek, barriz, irailaren 30era arte aurkeztu ahal izango dabe eskabidea, egun hori barne. Salmenta lizentzia doakoa da eta Euskal Herriko ekoizleei eta baserritarrei zuzenduta dago, azoka bakotxeko atalen arabera.
Parte hartzeko, jarduera profesionala justifikatzen dauen dokumentazinoa aurkeztu behar da. Eskatutako dokumentuen artean dagoz nekazaritza-ustiategiaren egiaztagiria, osasun-erregistroa eta manipulatzaile-txartela, Jarduera Ekonomikoen ganeko Zergan alta emotea eta Gizarte Segurantzarekiko betebeharrak beteten dirala egiaztatzea. Artisauen kasuan, beharrezkoa izango da, halaber, Bizkaiko Foru Aldundiko edo, bestela, Euskal Herriko beste aldundi edo artisau-elkarte batzuetako artisauen erregistroan alta emon izanaren ziurtagiria aurkeztea.
Eskaerak Herritarrentzako Arreta Zerbitzuan izapidetu daitekez, Foru Plazako 3. zenbakian, 07:30etik 14:00etara. Telematikoki be egin daitekez, ziurtagiri elektronikoaren bidez edo beste administrazino batzuen eta Correos-en bulegoen bidez.
Bi azoketarako inprimakiak udalaren webgunean dagoz eskuragarri, Izapideak atalaren barruan. Behin izena emoteko epea amaituta, Udalak eskaerak ebatziko dauz eta parte-hartzaile bakotxagaz harremanetan jarriko da azoka egin aurreko astean, onartua izan dan jakinarazteko.
Lehen astelehenaren kasuan, ebazteko eta jakinarazteko gehienezko epea zortzi egun baliodunekoa izango da, izena emoteko aldia amaitzen danetik kontetan hasita. Azken astelehenerako epea 15 egunekoa izango da.
