Joandako domekan Bermeok Bizkaiko Dantzarien Biltzarrak antolatutako Bizkaiko Dantzari Eguna hartu dau Lameran, Alkartasuna Dantza Taldearen 50. urteurrena ospatzeko antolatutako ekitaldien baitan.

Hori dela eta, ehunka dantzari eta bisitari elkartu dira herrian, Lamera kolorez, musikaz eta tradizioz betez.

Bizkaiko Dantzari Eguna Bizkaiko dantzarien urteko hitzordu nagusietako bat da, Biltzarrean federatutako taldeentzako topagune eta erakusleiho aparta bihurtzen da urtero. Era berean, eskualdez eskualde egiten dan ekimen honek euskal kulturaren transmisinoan eta sustapenean balio handia dau. Izan be, belaunaldi barriei folklorea gerturatzeko eta herritarren artean euskal kulturarekiko atxikimendua indartzeko ezinbesteko hitzordua bihurtu da urteotan.

Maiatzaren 22tik 24ra bitartean, itsasoari lotutako tradizinoa, kultura eta saboreak izango dira barriro be herriko kale eta gune nagusietako ardatz Bermeoko XXXII. Arrain Azokagaz. Urtez urte sendotu dan hitzordu honek itsasoa eta arrantzaleen lana omendu gura dauz, baina, aurten bereziki, itsasoaren zaintzaren eta jasangarritasunaren mezua lehen lerrora ekarriko dau.

Arrain Azokak arrantza eta gastronomia uztartu izan dauz betidanik, baina azken urteotan gastronomiak protagonismo handiagoa hartu dauela azpimarratu dabe antolatzaileek. Horregaitik, aurtengo edizinoan itsasoaren zaintza, konpromisoa eta arrantzaren inguruko kontzientzia berreskuratu gura izan dira, azokaren ardatz nagusietako bat bihurtuz.