Gernikako gerra-presoen ospitale militarra zarratu zaneko 86 urte beteten dira aurton eta horregaitik Pipergorri Kultur Alkarteak maiatzaren azken asterako hiru ekitaldi berezi antolatu dauz.

– Maiatzak 27: Joseba Eceolazaren “Las Voces de La República” libururaren aurkezpena.
– Maiatzak 29: “La Bala” filmaren emanaldia
– Maiatzak 30: “269 Memoriala” omenaldia.

Hainbat Alderdi politiko, sindikatu, herri erakunde, gobernuz kanpoko erakunde, giza eskubideen aldeko erakunde eta eragile sozialen ordezkariak bildu ziran Euskal Herria Museoan, eta Gernikaren herritik, bakea eta justizia manifestua irakurri eta sinatu dabe, gaur egungo egoeraren aurrean, erantzukizuna hartzeko konpromisoa hartuz eta genozidioa, gerra eta eskubide urraketen aurrean, eta bakearen eta justiziaren bidean, urrats kualitatiboak alkarregaz emonez.

Palestinako genozidioa eta Libanoren eta Iranen aurkako erasoak gogoan euki ebezan ekitaldian, beste gatazka batzuen zerrenda luzeari gehituz: Errusiaren Ukrainako inbasinoa, Afrikako eta Amerikako kontinenteetan etenbako desegonkortzea eta esku-hartzea, Mendebaldeko Sahararen okupazinoa, etab.

Erantzukizunez jokatzeko ordua dala aldarrikatuko dabe, atxikimendutik ekintzetara pasetako garaia dala azpimarratuz.

Martxan da ja Gernika-Lumoko XXXVI. Eskolarteko Antzerki Astea. Hasierako urteetan antzezle ziranak, oraingo antzezleen gurasoak dira. Aurtengo antzerki aste honi hasiera emoteko, Gernika-Lumoko Udaleko Euskara Zerbitzuak Udal Eskola Kontseiluagaz alkarlanean ikuskizun berezi bat aurkeztu eben joandako domekan Eriako Lorategiaren inguruan. Aurkezpen antzeztu hau herriko ikastetxe desbardinetako ikaslez osotutako taldetxo batek prestau dau, Oihane Enbeitaren gidaritzapean eta Segundo Olaeta Musika Eskolaren laguntzagaz. Ondorengo emonaldiak, ohiko bideari jarraituz Lizeo Antzokian izango dira, goizez ikasleei zuzenduta, eta arratsaldez ikastetxeetako familientzat. Azkenik, martiaren 31n itxiera emongo deutsie, eta hau be kalean, publiko orokorrari zuzendutako kale antzerki baten bidez: Panoli Kabareta.

1526tik euskal nortasuna eta autogobernua definidu dituan Bizkaiko Foru Barriaren onarpenaren V. mendeurrena ospatu dabe Gernikako Batzar Etxean. Ekitaldia sinbolismo instituzionalez beteta egon da, eta printzipio aurreratuak, bardintasuna, askatasunen babesa eta desbardinen arteko itun instituzionala, besteak beste, finkau ebazan lege-gorputzari balioa emoteko balio izan dau. Batzar Aretoaren erdian ikusgai egon dan Bizkaiko Foru Barriaren jatorrizko liburua izan da ekitaldiaren protagonista.