Bermeoko Osoko Bilkura
2026.urteko ekainaren 25eko Bermeoko Osoko bilkuran jorratutako gaiak zeintzuk idren ezagutu daiteke ekaineko pleno honetan.
Arbolapean kontzertu emanaldiak udako gaueak musikaz beteko dauz sei kontzertugaz
Kultur Etxeak sortzen ari dan talentuaren eta proposamen independenteen aldeko apustua egin dau barriro, bagiletik garagarrilera bitartean Seber Altube auditorioan egingo dan zikloan.
Arbolapean uda honetan itzuliko da Gernika-Lumora, eguen arratsaldeak zuzeneko musikagaz hitzordu bihurtuko dauzan bosgarren kontzertu programazinoagaz. Kultur Etxeak antolatuta, zikloa bagilaren amaiera eta garagarrilaren amaiera bitartean egingo da, Seber Altube auditorioan, eta astero izango dira emonaldiak, 20.00etatik aurrera.
Gernikako Arbolaren irudian eta Iparragirreren konposizino ezagunean oinarrituta, programeak orain dala bost urte sortu zan filosofiari eusten deutso: musika proposamen garaikideak zabaltzeko espazio bat eskaintzea, agertoki handietatik urrun, eskuragarri eta hurreko formauan.
Aurtengo edizinoa bagilaren 25ean hasiko da, Zuga taldearen emonaldiagaz. Astebete geroago, garagarrilaren 2an, Ziraunen txanda izango da. Egutegiak garagarrilaren 9an Sueder-ekin eta garagarrilaren 16an Naiz-ekin jarraituko dau, zikloaren azken txanpari Mikosis, garagarrilaren 23an, eta Intensidades Ortega-gaz ekin aurretik.
Bere edizino ezbardinetan zehar, Arbolapean herriko udako kultur proposamenetako bat lez finkatu da, sortzen ari diran artistentzako erakusleiho bat eta musika genero desbardinetako proiektu independenteak eskainiz.
Bermeok San Juan bezpera ospatu dau sua barik, baina giro eta parte-hartze handiagaz
Bermeok San Juan Bezpera ospatu dau aurten be, baina ohiko San Juan surik barik. Tenperatura altuak eta sute arrisku handia dirala eta, sua bizteagaz lotutako jarduera guztiak bertan behera uztea erabagi dabe segurtasuna lehenetsiz.
Halan be, ospakizunak ez dau indarrik galdu, eta herriko talde, alkarte eta boluntario ugarik parte hartu dabe urtero ehundaka herritar biltzen dauzan hitzorduan.
Kalejira gaueko bederatzietan abiau da Gizarte eta Kultura Etxetik, eta herriko hainbat txokotatik igaro da musika, dantza, txalapata, irrintziak eta euskal kulturaren adierazpen ugari eskainiz.
Antolatzaileek oso balorazino positiboa egin dabe aurtengo ospakizunaz. Azpimarratu dabe, sua izan ez arren, herritarrek bikain erantzun dabela eta jaiaren benetako espiritua mantenidu dala: herritarren arteko topaketa, tradizinoaren transmisinoa eta komunidadearen indarra.
Era berean, nabarmendu dabe segurtasuna lehenestea ezinbestekoa izan dala, Bizkai osoan erregistratutako tenperatura altuen aurrean.
Bermeok, beraz, erakutsi dau San Juanen esentzia ez dagoala soilik suan, baizik eta herritarren parte-hartzean, kulturaren transmisinoan eta belaunaldiz belaunaldi bizirik manteniduten diran ohituretan.
46 babesleku klimatikoz osatutako sare batek herritarrak babesten dauz jada Gernika-Lumon
Udalak Babesleku Klimatikoak ezartzeko lanak amaitu ditu. Udalerri osoan zehar banatutako azpiegitura da, tenperaturen igoerari aurre egiteko.
Klima aldaketara egokitzeak presentzia nabarmena du Gernika-Lumoko kaleetan eta ekipamenduetan. Udalak Babesleku Klimatikoen Sarea (Babesleku Klimatikoak) ezarri du. Azpiegitura hori 46 espaziok osatzen dute, udalerri osoan zehar banatuta, eta herritarrek leku seguruak eta erosoak izango dituzte muturreko beroaldietan.
Sarea kanpoko 36 babeslekuk osatzen dute, batez ere itzal eta aireztapen naturala duten parke, plaza eta berdeguneetan, bai eta udal eraikinetan eta espazio publikoetan kokatutako 6 babeslekuk ere, urteko hilabete beroenetan baldintza termiko egokiak mantentzen dituztenak. Gainera, etorkizunean egingo diren handitzeetan sarean sartzeko ahalmena duten beste lau espazio identifikatu dira.
Babesleku guztiak seinaleztatu eta informazio-sistema batean sartu dira, herritarrek errazago aurki eta erabil ditzaten. Helburua da edozein pertsonak tenperatura altuetatik babesteko espazio hurbil bat izatea, bereziki egunaren erdiko orduetan eta beroagatiko alerta egoeretan.
Unai Argarate izan da ekaineko Ezetz Jakin lehiaketako irabazlea
Ekaineko ezetz jakin lehiakatan 81 parte hartzaile izan dira, dana artean, Unai Argaratek erabman dau saria. Bere alabak jaso dau saria. Bestealde. 20 euroko bonoa irailera arte erabili ahal izango dauana Nagore Andrinuak irabazi dau. parte hatzaileen saria irabazi ostean.
Berbalaguneko kide dan Ibai Urrutiaren arabera, euren Bataz bestekotik gora ibili dira hilabete guztietan, benetan eskertute dauzela adierazi dabe eta Ezetz Jakinegaz azaroan bueltatuko diala, uda ostien baerbalaguneko talde barriak eta ekintza barriak sortzen hasiko dirala azpimarratzeaz gain.
Bermeoko Irakurleen Txokoetan izena emateko epea zabalik dago ekainaren 30era arte
Bermeoko Udalak datorren ikasturterako irakurleen txokoetan izena emateko epea zabaldu du, eta interesa duten herritarrek ekainaren 30era arte izango dute parte hartzeko aukera.
Aurten ere, bi talde eskainiko dira: ohiko irakurle txokoa eta irakurle txoko feminista. Izena emateko, herritarrek Liburutegira bertara jo dezakete edo udalaren egoitza elektronikoaren bidez egin dezakete eskaera, dagokion inprimakia betez.
Aurtengo berrikuntzen artean, aurreko ikasturteko parte-hartzaileek lehentasuna izango dute plaza esleitzerakoan. Gainera, eskari handia egonez gero, ohiko irakurle txokoaren bigarren talde bat sortzeko aukera ere aurreikusi da.
Bi taldeek gehienez hamabost lagun izango dituzte, eta saioak doakoak izango dira. Ohiko irakurle txokoa hileko hirugarren eguaztenetan elkartuko da, eta irakurle txoko feminista, berriz, hileko azken eguenetan.
Bi taldeak Nagore Fernandez Zabalak dinamizatuko ditu. Irakurle txoko feministak literatura genero ikuspegitik aztertuko du, eta ohiko taldeak, berriz, urteetan sendotutako irakurzaletasunari jarraipena emango dio.
Ekimenaren helburua irakurketa sustatzea, euskarazko literatura ezagutaraztea eta herritarren arteko topagune dinamiko eta parte-hartzailea sortzea da.
Beraz, Bermeoko Udalak gogorarazi du izena emateko epea oraindik zabalik dagoela, eta interesa duten herritarrei dei egin die ekainaren 30a baino lehen izena eman dezaten, datorren ikasturtean irakurzaletasunaz taldean gozatzeko aukera gal ez dezaten.
Alokairu sozialeko 52 etxebizitza eraikiko dabez kaltzadape kalean
Bermeok beste urrats garrantzitsu bat emango du etxebizitza eskuragarria sustatzeko bidean. Visesa sozietate publikoak eta Bermeoko Udalak hitzarmena sinatu dute alokairura bideratutako babes ofizialeko 52 etxebizitza eraikitzeko.
Sustapena Kaltzadape kalean egingo da, eta helburua udalerriko etxebizitza publikoaren eskaintza handitzea izango da, bereziki gazteei eta etxebizitza eskuratzeko zailtasunak dituzten familiei aukera berriak eskainiz.
Akordioaren arabera, Bermeoko Udalak doan lagako du eraikuntza egiteko lurzorua, eta Visesak sustapenaren garapenaz arduratuko da. Guztira, 10 milioi eurotik gorako inbertsioa aurreikusi da.
Visesako zuzendari nagusi Carlos Quindosen arabera, asmoa da proiektua aurtengo irailean lizitatzea, lanak ahalik eta azkarren martxan jartzeko.
Behin etxebizitzak amaituta, Alokabidek kudeatuko ditu, eta Eusko Jaurlaritzaren alokairuko etxebizitza publikoen parkearen parte izango dira.
Bermeoko alkate Nadia Nemeh Shomalyk azpimarratu du proiektuak herritarren benetako behar bati erantzuten diola, eta erakundeen arteko lankidetzaren bidez udalerri irisgarriagoa eta etorkizuneko aukera gehiago eskainiko dituen herria eraikitzen jarraituko dutela.
Erakundeek nabarmendu dute ekimen hau etxebizitza duina eta eskuragarria bermatzeko estrategiaren barruan kokatzen dela, Bermeoko herritarren bizi kalitatea hobetzeko helburuarekin.
