Aurten 20 urte beteko dira Bermeoko Erraldoien Konpartsa sortu zenetik. Bi hamarkadatan zehar, konpartsak herriko jai-giroaren, kultur transmisinoaren eta herri-nortasunaren parte bilakatu diran personaiak zaindu, sustau eta bizirik mantenidu dauz, hainbat herritarren konpromisoari eta lan boluntarioari esker.

Urteurrena dala eta, Bermeoko Erraldoien Konpartsak hainbat ekimen antolatu dauz bere ibilpidea herritargaz partekatzeko eta azken hogei urteetan egindako lana balioan jartzeko.

Lehenengo ekimenetako bat Arrantzaleen Museoan ikusgai dagoen erakusketa da. ekainren 14ra arte bisitau ahal izango da, museoaren ohiko ordutegian, eta bertan konpartsaren bi hamarkadetako ibilpidea jasotzen daben argazkiak eta ikus-entzunezko materiala dagoz ikusgai.

Era berean, Nestor Basterretxea aretoan bigarren erakusketa bat antolatu da.

Bi hamarkada hauetan, Bermeoko erraldoiak herriko jai, ospakizun eta ekitaldi nagusietako ezinbesteko protagonistak izan dira. Anton, Josefin, Lorentzo eta Mari ez dira soilik erraldoiak.

Etorkizunari begira be urrats garrantzitsuak emoten ari dira. Izan be, Bermeoko Udala erraldoien panpinak egiten ari da, herriaren ondare kultural hori indartu, barritu eta datozen belaunaldiei transmititzeko helburuagaz; laster egongo dira denen eskura. Modu horretan, azken 20 urteetan egindako lanari jarraipena emongo jako.

Bermeoko Udalak BIZTU BERMEO Jarduera Fisikoaren Orientazio Zerbitzua jarri dau martxan. Gizarte Ongizate Sailak sustatutako eta Kirol Sailaren lankidetza estuari esker garatutako ekimen barriaren helburua da herritarren artean jarduera fisikoaren ohiturak sustatzea.

Jarduera fisikoa erregulartasunez egiteak onura ugari dakarz osasun fisiko eta mentalean, eta eraginkorra da hainbat gaixotasunen prebentzinoan nahiz tratamentuan. Premisa horretatik abiauta, BIZTU BERMEOk herritarrei laguntza personalizatua eskainiko deutse, jarduera fisikoa beren eguneroko bizitzan txertatu eta ohitura osasungarriak sendotu daiezan.

Zerbitzuaren bidez, orientatzaile espezializau batek erabiltzaile bakotxaren egoera, beharrak, aukerak eta lehentasunak aztertuko dauz, eta horien arabera jarduera fisikoko programa personalizatua diseinatuko dau. Halaber, erabiltzaileagaz adostutako helburuen jarraipena egingo da, jarduera fisikoa modu egonkor eta iraunkorrean mantenidutea errazteko.

Udalak, Bermeorentzat saretze-lana “oso garrantzitsua” dala nabarmendu dau: Herrian hainbat zerbitzu dabez baina horien guztien arteko koordinazino eta bateratasun handiagoa beharrezkoa zala sumatzen ebela azpimarratu dabe.

Zerbitzuaren ardura Iñigo Iriondo Duque bermeotarrak izango dau, Jarduera Fisikoaren eta Kirolaren Zientzietan graduatuak eta erabiltzaile bakotxari bere egoerara hobeen egokitzen dan jarduera proponidu ahal izango deutso.

BIZTU BERMEOren ezaugarri nagusietako bat osasun publikoaren arloko profesinonalekin izango dauen lankidetza estua izango da. Anbulategiko profesinonalek herritar bati jarduera fisikoa egitea komenidu jakola eretxiz gero, orientazino zerbitzura bideratu ahal izango dabe. Horretarako, “Kirol-errezeta” agiria beteko dabe, eta erabiltzaileak dokumentu hori aurkeztu beharko dau orientatzaileagaz izango dauen lehen kontsultan.

Lehenengo hitzordu horretan, erabiltzailearen bizi-ohiturak aztertuko dira, eta haren egoerara egokitutako ariketa fisikoaren proposamena egingo da. Zein jarduera egin, zer maiztasunekin egin eta zein jarraibide bete zehaztuko da, eta ondoren ezarritako planaren jarraipena egingo da. anbulategiarekin batera, udaleko Gizarte Ongizate Sailagaz be lankidetza sustatuko da, herritarren arreta integrala bermatzeko.

Zerbitzu barriaren eginkizun nagusien artean dagoz jarduera fisikorik egiten ez daben edo oso gitxi egiten daben personak identifiketea; zerbitzura jotzen daben herritarren jarduera fisikoaren maila eta bizi-ohiturak ebaluetea — elikadura, lan-bizitza, gizarte-bizitza eta jarduera fisikoaren historia kontuan hartuta —; jarduera fisikoaren onurei eta zerbitzuaren funtzinonamentuari buruzko informazinoa emotea; eta persona bakotxaren ezaugarri, egoera sozial eta gustu personaletara hobeen egokitzen diran jarduerak identifiketea.