Otsailaren 11n, Emakumearen eta neskatoaren nazioarteko eguna zientzian ospatzeko eta goraipatzeko asmoarekin, Kultur Etxeak eta Udaletxeko Berdintasun Sailak elkarlanean “26 emakume zientzia, arte eta letretan” erakusketa prestatu eben.
Domingo Alegria plazan kokatutako erakusketa da hau, datorren zezeilaren 16ra arte egongo dana, kaleko erakusketa izango dala esan dabe Gernika-Lumoko Udaletik. Erakusketak 26 akademiko aurkezten dauz, ibilpide eta belaunaldi desbardinetakoak: ibilpide profesinonal luzea daben emakumeak, beren diziplinetan bikaintasuna lortu dabenak, eta zientziaren, arteen eta letren arloetan lan barritzailea eta puntakoa egiten daben akademiko gazteagoak.
Busturialdeko ikasle gazteak zientzia, teknologia eta arte arloetan orientetako eta trebatzeko antolatutako jardunaldietan parte hartu dabe.
Gernika-Lumoko Jai Alai frontoian, arlo zientifiko-teknikoari eskainitako topaketan, eskualde osoko 177 ikasle izan dira, eta 163 ikasle Bermeoko Artza frontoian egin dan arlo artistiko-sozialari buruzko jardunaldian.
Jardunaldi honeek Bizkaiko Foru Aldundiaren eta Ajangiz, Arratzu, Bermeo, Busturia, Elantxobe, Ereño, Errigoiti, Forua, Gautegiz-Arteaga, Gernika-Lumo, Kortezubi, Mendata, Morga, Mundaka, Murueta, Muxika, Nabarniz eta Sukarrieta udalerrien artean sinatutako “Bizkaia Gazteak Busturialdea 2025-2027” lankidetza-hitzarmenaren barruan kokatzen dira. Hitzarmenaren helburua da udalerri horietako gazteria arloko politika integrala ezarri, bultzatu eta garatzea.
