Bermeoko Jaien aurkezpena
Bermeoko Andra Mari eta Santa Eufemia jaiak gero eta gertuago daude, eta Udalak aurtengo egitarauaren nondik norako guztiak aurkeztu ditu. Irailaren 7tik 16ra bitartean, hamar egunez, kultura, musika, kirola, gastronomia eta kale-giroa izango dira protagonista. Xehetasun guztiak Endika Etxebarria Kultura zinegotziak eta Maite Caruezo Gazteria Zerbitzuko zinegotziak eman dituzte.
Aurtengo jaietan hainbat berritasun eta itzulera izango dira. Besteak beste, Salome Campos Itsas Zeharkaldia eta Sukalki Eguna bueltatuko dira egitaraura. Gainera, jaien hasierako txupinazoa 20:00etan izango da, eta Garoa Martinez Anasagasti halterofiliako txapelduna izango da aurtengo pregoilaria, herritarren bozketa irabazi ostean.
Musikak ere pisu handia izango du hamar egunetan. Jaiei hasiera emateko, ETS taldeak kontzertua eskainiko du Lameran, eta ondorengo egunetan Cherry and The Ladies, Mariachi Imperial, Oxabi, Txapela Brava, Niña Dioz, Merina Gris eta Akerbeltz talde eta artistek hartuko dute parte, besteak beste. Kalejirak, fanfarreak, elektrotxarangak eta trikitilariak ere ez dira faltako.
Egitarauan kirolak ere bere lekua izango du, eta gastronomia arloan, berriz, Sukalki Eguna eta beste hainbat ekitaldi izango dira. Gazteen eta herritarren parte-hartzea ere bultzatuko da, Txosna Batzordearen programazio zabalarekin eta hainbat jarduerarekin.
Bestalde, Udalak jaiak gero eta inklusiboagoak izateko neurriak indartu ditu. Lamerako kontzertu gunean mugikortasun urriko pertsonentzako plataforma jarriko da, eta txupinazoan zeinu hizkuntza ere erabiliko da. Horrez gain, Bermibus Gautxoria eta Puntu Morea izango dira jaietan, segurtasuna eta errespetuzko jai-giroa sustatzeko.
Hamar eguneko egitarauarekin, Bermeok prest dauka, beraz, urteko hitzordu garrantzitsuenetako bat. Udalak, Jai Batzordeak eta Txosna Batzordeak herritarrak jaietan parte hartzera eta Andra Mari eta Santa Eufemia jaiak errespetuz eta askatasunez bizitzera gonbidatu dituzte.
