
Mestikabasoko kirolgune estali berria datorren larunbatean inauguratuko dabe
Gernika-Lumoko Udalak azaroaren 14an, 12:30ean, egingo du instalazio berrituaren inaugurazio-ekitaldia. Lanek 1.032.562 euroko inbertsioa izan dute, eta estalki handi bat, kalistenia-gunea eta hainbat hobekuntza ekarri dituzte.
Mestikabasoko kirolguneak irudi berritua estreinatuko du datorren azaroaren 14an, larunbatean. Gernika-Lumoko Udalak 12:30ean egingo du instalazio berrituaren inaugurazio-ekitaldia, kirol-eremua osorik berritzeko eta herritarren erabilerarako aukerak zabaltzeko egindako lanen ostean.
Proiektuak 1.032.562,24 euroko inbertsioa izan du, BEZa barne. Esku-hartzearen lan nagusia kirol-pista eta haren ingurua estaltzen dituen egitura arin handi bat jartzea izan da. Estalki berriari esker, eguraldi txarraren aurrean babestuta egongo da kirol-eremua, eta urte osoan zehar erabili ahal izango da. Gainera, egitura inguruko etxebizitzekin eta paisaiarekin ahalik eta modu egokienean integratzeko diseinatu dute.
Berrikuntzen artean, kalistenia-gune berria ere nabarmendu behar da. Barrak, paraleloak eta entrenamendu funtzionalerako bestelako elementuak jarri dituzte bertan, herritarrek norberaren gorputzaren pisua erabiliz ariketa fisikoa egiteko aukera izan dezaten.
-
Azken berriak





























