San Lorentzoak datoz
Gernika-Lumoko Lurgorri auzoa prest dago San Lorentzoko jaiak ospatzeko. Abuztuaren 10ean eta 11n egingo dira jaiak, eta bi egunetan zehar adin guztientzako egitarau zabala prestatu du Jai Batzordeak.
Lehen egunean, txupinazoarekin emango diote hasiera festari. Ondoren, mendi martxa, meza nagusia, Urdaibai Kantagunea, erregelak eta dantzak, herri bazkaria, mus txapelketa, umeentzako jolasak, herri kirol erakustaldia, bertso saioa eta irrintzi lehiaketa izango dira, besteak beste.
Abuztuaren 11n, San Lorentzoren egunean, tortilla eta gilda txapelketak, meza nagusia, gazta eta garbantzu jolasak, zurezko jolasak, buruhandiak eta txokolatada izango dira protagonista. Gauean, berriz, musikak hartuko du lekukoa, Sueder, Skabidean eta Altxaporru taldeen kontzertuekin, eta amaieran DJ Elepunto arduratuko da jaiari amaiera emateaz.
Antolatzaileek herritar guztiak gonbidatu dituzte Lurgorrira hurbiltzera eta giro onean, musikaz, kirolaz eta tradizioz betetako San Lorentzoko jaiez gozatzera.
