Arteskolako muralaren lehen fasea amaituta dago
Mertzedeko eskolaren inguruko fatxadan egiten dabiltzan 255 metro koadroko horma-irudiaren lehenengo fasea amaitu da. Julen Munitis Arteskolako kideak eta José María Gorroño Gernika-Lumoko alkateak ekimenaren garrantzia nabarmendu dute.
Gernika-Lumoko Errenteria auzoan egiten dabiltzan mural handiaren lehenengo fasea amaituta dago. Arteskola elkarteko kideak buru-belarri dabiltza lanean, herriko historia, ondarea eta nortasuna irudikatuko dituan horma-irudia aurrera eroateko. Mertzedeko eskolaren ingurutik ikusten den eraikin baten albo-fatxadan egiten dabiltzan lana 255 metro koadrokoa da.
Julen Munitis bertako artistak diseinatu du murala, eta Arteskolako bi ikasle arduratzen dira diseinua horma handira eroateaz. Proiektuaren lehenengo fasea amaituta, aurrerapauso garrantzitsua eman da herriko paisaia urbanoari irudi berri bat emateko eta Gernikako historia artearen bidez herritarrengana hurreratzeko.
Ekimenaren inguruan, Julen Munitis Arteskolako kideak eta José María Gorroño Gernika-Lumoko alkateak ere hitz batzuk eskaini dituzte, proiektuaren balioa eta herriarentzat duen garrantzia azpimarratzeko.
