Gernika-Lumo Nazioarteko Bakearen eta Adiskidetzearen aldeko erreferentea bilakatu da, Angolan
Gernika-Lumok nazioarteko bakearen eta adiskidetzearen aldeko erreferente gisa parte hartu du Angolako Luandan egin den “Bakearen aldeko Oihua, Gerren Amaiera eta Nazioarteko Zuzenbidearen Errespetua” ekimenaren hirugarren edizioan. Bertan izan dira Jose Maria Gorroño alkatea eta Jon Lejarraga alkateordea, Nazio Batuen Erakundeko Zibilizazioen Aliantzak (UNAOC) eta Religions for Peace erakundeak antolatutako topaketan.
Jardunaldian Luandako Adierazpena onartu da, nazioarteko bakearen, elkarlanaren eta nazioarteko zuzenbidearen aldeko konpromisoa berretsiz. Gorroño alkateak azpimarratu du bakea ez dela gerrarik eza soilik, baizik eta elkarrizketa, justizia, aukerak eta itxaropena eraikitzea. Halaber, iraganetik ikastearen eta belaunaldi berriei etorkizun baketsua bermatzearen garrantzia nabarmendu du.
Duela bi urte Gernika-Lumon sortutako ekimenak Sarajevo eta, aurten, Luanda hartu ditu geldialdi, gatazkek markatutako hiriak memoria, adiskidetzea eta bakearen aldeko konpromisoaren bidez lotuz. Foro honetan parte hartzeak Gernika-Lumoren nazioarteko aitortza indartzen du, bakearen eta giza eskubideen aldeko erreferente gisa.
